تورخم سوداګريز بندر، يو وخت تود و خو اوس شړ شوی

د پاکسان او افغانستان د سوداګريزو راکړو ورکړو له اغېزمنېدو سره په نامنلې پوله تورخم بندر دا وخت شړ دی او د پخوا په څېر پکې د خلکو او سوداګریزو لاريو ګڼه ګوڼه نه ليدل کېږي. ويل کېږي چې د يادو دواړو هیوادونو ترمنځ د سياسي مخالفتونو له امله د سوداګرۍ کچه په زیاته اندازه راښکته شوې چې له دې سره زرګونو پاکستانيانو خپل روزګارونه له لاسه ورکړي دي.
بل خوا ويل کېږي چې پاکستان د چاه بهار بندر د پراخېدونکي سوداګريز حيثيت د نه زغملو په لړ کې د نيمروز ولايت په دښتو کې داسې وسله وال راپورته کړي چې يواځينئ موخه يې د يادې لارې ناامنه کول او د چاه بهار بندر سوداګريزې چارې اغېزمنول دي.
د پاکستان ډیلي ټایمز لیکي چې د پاکستان له لارې د افغانستان ټرانزیټ سوداګري په ۲۰۱۷ کال کې یو اعشاریه شپږ ملیارده ډالرو ته را ټیټه شوې خو د چابهار بندر له لارې له هند سره سوداګري پراخه شوې ده.
ورځپاڼې د افغانستان پاکستان د ګډې سوداګرۍ خونې د مشر جنید اسماعیل په حواله لیکلي چې د دواړو هېوادونو ترمنځ سوداګرۍ د سیاسي اړیکو له امله ډیره اغیزمنه شوې او د ده په وینا که سیاست او سوداګري سره جلا شي نو د دواړو هېوادونو ترمنځ راکړه ورکړه تر اوه نیم ملیارد ډالرو پورې لوړېدلی شي.
که داسې وشي او سياست او سوداګری سره جلا شي، نو په دې سره به د ورځپاڼې په وينا سل زره پاکستانيانو ته د کاروبار زمینه برابره شي.
ورځپانه وړاندې لیکي، هند د افغانستان او پاکستان ترمنځ له ستونزو په ګټې پورته کولو افغان سوداګرو ته ډیرې اسانتیاوې برابرې کړې دي او له افغانستان سره یې راکړه ورکړه کې د پام وړ زیاتوالی راغلی.