پنجشنبه , اکتوبر 1 2020
کور / خبرونه / د زابل اوسیدونکو د ولسي جرګې وروستۍ پریکړه وغندله

د زابل اوسیدونکو د ولسي جرګې وروستۍ پریکړه وغندله

د زابل اوسیدونکو د ولسي جرګې وروستۍ پریکړه وغندله

د زابل ولایت د بیلابیلو مدني ټولنو او قومي شورا استازو او مشرانو د یو مطبوعاتي کنفرانس په ترڅ کې د تذکرو په اړه د ولسي جرګې وروستۍ پریکړه وغندله او هغه یې د اساسي قانون خلاف وبلله دوي ګواښ وکړ چې که ژر دغه ستونزه د اساسي قانون سره سم هواره نشي خپل مدني اعتراضونه به پراخ کړي.

دغه مطبوعاتی غونډه چې نن چهار شنبه جوړه شوې وه پکښي ټينګار وشو چې اسلام او افغان کلیمې د افغانانو ارزښتونه دي او هیچا ته به اجازه ورنکړي چې له تذکرو څخه یې لیري کړي.

د کنفرانس تنظیموونکو وویل دوي د ولسمشر د هغې پریکړې ملاتړ کوي چې د تذکرو د ویش په اړه یې وکړه ځکه د ملي یووالی لپاره ګټور و.

د کنفرانس وینا والو وویل دوي نه پوهیږي وکیلان ولي د دین او ملت د کلیمو مخالفت کوي ځکه په تذکره کې په لیکل کیدو سره یې هیچا ته زیان نه رسیږي خو دا چې د ولسی جرګې غړو د قومونو د ویش لپاره دا ګام اوچت کړې ځکه یې په ټول افغانستان کې پر وړاندي غبرګونونه راپورته شوي دي.

دوي خبرداری ورکړ د خبري کنفرانس په ترڅ کې وویل چې د هغو تذکرو ویش ته به اجازه ورنکړي چې پکې اسلام او افغان نه وي لیکل شوي.

مدني فعالینو د خپل مطبوعاتي کنفرانس پر مهال له مشرانو جرګې وغوښتل چې د ولسي جرګې پریکړه رد کړي او د ملي ګټو ساتنه وکړي.

د کنفرانس ګډونوالو وویل د ملي یووالی او وروڼو قومونو تر منځ د نفاق د مخنیوي لپاره حاضر دي چې خپل مدنی اعتراضونه پراخ کړي او لاریونونه وکړي.

د زابل ولایت د مدني ټولنو استازي او مشران په داسی حال کې د ولسی جرګې د پریکړي غندنه کوي چې له تیرو دوو ورځو راهیسي د هیواد په بیلابیلو ولایتونو کې له تذکرو د دین او ملت د ایسته کولو په اړه سخت غبرګونونه را پاریدلی دي.

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

%d bloggers like this: