ملي تدارکاتو کمېسیون دروغتیا سربیره یوشمیر رغنیزی پروژی منظور کړي

د افغان ولسمشرمحمد اشرف غني په مشرۍ د ملي تدارکاتو کمېسیون  غونډه پرون ماښام په ارګ کې د یو شمېر  کورنیو او بهرنیو څارونکو په ګډون ترسره شوه.

د ملي تدارکاتو کمېسیون په دې غونډه  کې د بېلابېلو تدارکاتي ادارو پر یو شمېر پروژو له بشپړ بحث وروسته د ۳.۷ میلیارد افغانیو په ارزښت دغه  ۱۱ لویې پراختیایي پروژې منظور شوې:

–        د کابل ښار اړوند د خیر خانې  د سړکونو جوړول او قیرول، د نجارانو قلعه له څلور لارې  څخه تر تایمني پورې، له شمالي سرای څخه تر ګولایي حصه اول پورې، له ګولایي حصه اول څخه تر نجارانو قلعه پورې او له نجارانو قلعه څخه تر خشت هوختیف پورې

–        د غزني ولایت اړوند د قره باغ ــ جاغوري لومړۍ برخې دسړک د جوړولو قرارداد

–        د کابل ــ لوګر د دوهم لین د سړک د جوړولو د قرارداد ورکړه

–        د دایکنډي ولایت له رباط څخه تر میر امور ولسوالۍ پورې د سړک د جوړولو قرارداد

–        له شبرغان تر سرپل پورې د سړک د جوړولو قرارداد

–        پنجشېر ولایت کې د ۱۰۰ بستریز روغتون جوړولو قرارداد

–        د کابل ښار اړوند د پنځو روغتونونو لپاره (وزیر محمد اکبر خان، ابن سینا، صحت طفل، د خیر خانې او جمهوریت ۱۰۲ بستر) د عاجلو شعبو او جدي مراقبتونو د اړتیا وړ  درملو قرارداد

–        د کابل برېښنا ریاست د برېښنا د ۱۲۳ قلمه تجهیزاتو د تدارک قرارداد

–        د پروان ولایت اړوند پشته سرخ څخه تر غوربند ولسوالۍ پورې د برېښنا د سب اسټېشن د ۱۲ قلمه تجهیزاتو د تدارک قرارداد

–        د کورنیو چارو وزارت اړوند د پنځه قلمه غیر البسوي مصرفي توکو د تدارک قرارداد

–        او د ملي دفاع وزارت اړوند د پنځه عراده اور وژونکو موټرو د تدارک قرارداد.

سربېره پردې د ملي تدارکاتو کمېسیون د ملي اردو د یونیفورم د ګنډلو د قرارداد د وخت تمدید او انرژۍ او اوبو وزارت اړوند له عادي څراغونو څخه کم مصرفه ځراغونو ته د تبدیلي د پروژې د آفر د ارزونې  د اجازې غوښتنلیک تائید کړ، مګر د ۲۰۱سېلاب قول اردو د صحرایي تحکیماتي ۱۶ قلمه موادو د قرارداد د فسخې په اړه د ملي دفاع وزارت اړوند وړاندیز یې  د تخنیکي ستونزې د له منځه وړلو په غرض بېرته ور وګرځاوه.

د ملي تدارکاتو کمېسیون په دې ناسته کې د کمېسیون پر رئیس او غړیو سربېره د کورنیو او بهرنیو څارونکو په ګډون د ولسي جرګې د مالي او بودجې کمېسیونونو، سيګار، سېستیکا غوڅ ملاتړ او د افغانستان د روڼتیا څار ادارې برخه اخستې وه.