سه شنبه , اپریل 20 2021
تازه سر ټکي
کور / خبرونه / پاکستان / پاکستان ويلي که چاته يې پر خاوره ترهګر معلوم وي، همکاري دې وکړي

پاکستان ويلي که چاته يې پر خاوره ترهګر معلوم وي، همکاري دې وکړي

د پاکستان دفاع وزیر وايي، د افغانستان لپاره په خپله خاوره کې له چا سره جګړه نه شي کولی. خو مبصرين وايي پاکستان په دې سره دا ثابتوي چې د افغانستان په ګډون د ټولۍ نړۍ له هغې غوښتنې مخ اړوي، چې د ترهګرو پر ضد د ګام پورته کولو په اړه ده.
په دې وروستيو کې امريکې بيا له دغه هیواد غوښنتي چې په خپله خاوره د ترهګرو پټنځايونه له منځه يوسي، مګر پاکستان په همدې لنډ وخت کې د دې موضوع په اړه څو ډوله ژبه کاروي. پاکستان کله وايي په خاوره کې يې د ترهګرو هېڅ پټنځای نه دی پاتې، خو کله ترې بيا خپله دا خبره هېره شي او وايي پاکستان په خپله خاوره د چا لپاره جګړه نه شي کولای.
تر دې وړاندې په ځلونو پاکستاني چارواکو د افغان طالبانو د پناه ځایونو د ویجاړولو د غوښتنې په ځواب کې ویلي چې په خپله خاوره کې له افغان طالبانو سره جنګ نه کوي ځکه چې د افغانستان جګړه به د پاکستان خاورې ته وغځېږي.
د پاکستان دفاع وزیر ادعا وکړه چې په خپله خاوره کې یې د تروریستانو ټولې شبکې له منځه وړي او دا تصور سم نه دی چې لا هم په پاکستان کې د تروریستانو خوندي پناهځایونه شته.
دستیګر زیاته کړه، پاکستان د امریکا متحدو ایالتونو ته په زغرده ویلي چې له ترور سره جګړه دې د افغانستان په خاوره کې وکړي، نه په پاکستان کې ځکه چې «موږ په خپله خاوره کې د ترور عوامل له منځه وړي دي.»
د پاکستان دفاع وزیر وویل، پاکستان په افغانستان کې د سولې غوښتونکی دی او که افغانستان د پاکستان په خاوره کې د سختدریځو د موجودیت او د پناهځایونو په اړه معلومات لري، له پاکستان سره دې یې شریک کړي؛ پاکستان به یې پر ضد اقدام وکړي.
د افغانستان حکومت په ځلونو ویلي چې پخوا یې له پاکستان سره دا ډول معلومات شریک کړي خو پاکستان هیڅ اقدام نه دی کړی.

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *