دوشنبه , سپتمبر 28 2020
کور / خبرونه / قبايل / اسد اپريدی د جماعت الاحرار ډلې نوی امير مقرر شو

اسد اپريدی د جماعت الاحرار ډلې نوی امير مقرر شو

دټرايبل نيوز د سرچينو د معلوماتو له مخې د جماعت الاحرار توندروه ډلې د پخواني امير عمر خالد خراساني د مړینې له تايد وروسته يادې ډلې خپل نوی امير ټاکلی دی.

د معلوماتو له مخې تېره شپه د يادې ډلې اړونده شورا په غوڅ تفاهم سره اسد اپريدی خپل نوی امير ټاکلی دی.

دا په داسې حال کې ده چې له تېرو دوو ورځو راهېسې د جماعت الاحرار ډلې د پخواني امير، عمر خالد خراساني د وژل کيدو په اړه خبرونه راتلل، چې نوموړی د پاکستان او افغانستان ترمنځ نامنل شوې پولې ته نېږدې په پکتيا ولايت کې د بې پيلوټه الوتکې په بريد کې نښه شوی.

بل خوا داسې خبرونه هم خپرېدل چې د نوموړي وژل کېدل يې نه تايدول، خو اوس د توندروه ډلې جماعت الاحرار لخوا هم په رسمي توګه د هغه د وژل کېدو تايد شوی او تېره شپه د يادې ډلې د اړونده شورا په اکثر رايو نوی امير، اسد اپريدی ټاکل شوی دی.

د جماعت الاحرار ډلې لخوا هغه خبرونه هم رد شول، چې ويل يې د دې ډلې پخوانی مشر عمر خالد خراساني د افغانستان په پکتيا ولايت کې بې پيلوټه الوتکې نښه کړی. اوسني معلومات وايي عمر خالد خراساني په پکتيا ولايت کې نه بلکې د ننګرهار د لالپورې ولسوالۍ اړوند بېلې سيمه کې د افغان ځواکونو په يوه چاپه کې د اوو نورو کسانو سره وژل شوی دی.

اسد اپريدي د دې نه وړاندې د جماعت الاحرار ډلې د معاون په توګه فعالیت کاوه. د هغه خپل نوم دوست محمد دی او د خيبر اجنسۍ زخه خيلو قوم سره تړاو لري. اسد اپريدی په ۲۰۱۴ کال کې د جماعت الحرار ډلې له اړه په خپلو ليکو کې ومنل شو، هغه تر دې وړاندې د افغان طالبانو يوې ډلې سره تړلی و.

د يادولو ده چې په دې وخت کې د توندروه ډلې جماعت الاحرار ترمنځ په جنګي او سياسي پاليسيو سخت اختلاف سر راپورته کړی، خو مبصرين وايي د عمرخالد خراساني د وژل کېدو له رسمي تايد نه وروسته به د نوي امير سره راپورته شوي اختلافات له منځه ولاړ شي.

 

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

%d bloggers like this: