اسفندیار ولي: ډیورنډ کرښه دې هم پرانېستل شي

د عوامي نشنل ګوند مشر اسفندیار ولي خان د پاکستان او هند تر منځ دکرتارپو دهلېز پرانېستل ښه ګام بللی، خو غوښتنه یې کړې چې دا ډول ګام دې پر ډیورنډ کرښه هم واخیستل شي.
اسفندیار په یوه بیان کې ویلي، دغه ډول ګام به د دواړو غاړو پښتنو د محرومیت احساس له منځه یوسي.
د ټرېبیون د رپوټ له مخې، اسفندیار زیاته کړې چې دواړه غاړه پښتانه یو کلتور او ارزښتونه لري.
د اسفندیار په وینا، که واک ترلاسه کړو، نو پر ډیورنډ کرښه به لس دهلېزونه پرانېزو. د هغه په وینا، دې سره به سوداګري او اقتصاد وغوړېږي.
پرون د پاکستاني پنجاب او هندي پنجاب د سکانو له پاره په پاکستانۍ خاوره کې د کرتارپور دهلېز پرانېستل شو چې د هوکړې له مخې، سکان به له ویزې پرته ورځي او خپل مذهبي مراسم به تر سره کوي.