ایا پښتون ژغورنې غورځنګ سیاسي کېږي؟

د پښتون ژغورنې ځینې مخکښ مشران چې سیاسي فعالان هم دي او وړاندې تر دې، چې له پښتون ژغورنې غورځنګ سره یو ځاې شي، د پاکستان په انتخاباتو کې یې د برخې اخیستو چمتوالی نیوه. محسن داوړ عوامي نیشنل گوند یا اې این پي گوند د ځوانانو د څانگې له مشرۍ نه په دی خاطر لرې کړل شو، چې هغه له پښتون ژغورنې غورځنګ سره یو ځای شو. دغه راز علي وزیر چې په ٢٠٠٨ او ٢٠١٣ کال کې یې په انتخاباتو کې د ازاد کاندید په حیث برخه اخیستي وه، یو ځلې بیا په انتخاباتو کې برخه اخلي. د پښتون ژغورنې غورځنګ مشر منظور پښتین په خپل فیسبوک دغه خبره کړې ده، چې د هغوي تحریک یو غیر سیاسي تحریک دی او دا اراده نه لري چې په سیاست کې برخه واخلي. پښتین وایي، غورځنګ یې د دې لپاره جوړ کړی، چې سیاسي گوندونه د پښتنو د لویو ستونزو په حلولو کې پاتې راغلي دي. په ورته وخت کې علي وزیر او محسن داوړ د ٢٠١٨ کال ټاکنو په اړه ویلي، چې دوی د تحریک په اړه له پیل نه لا دا پریکړه کړې ده، چې پښتون ژغورنې غورځنګ به غیر سیاسي ساتي. خو زیاته کړې یې ده، چې که چیرته یې غورځنګ پرېکړه وکړه چې په ټاکنو کې برخه مه اخلی نو په هیڅ صورت به یې وانخلي. د یادونې وړ ده، چې د پاکستان حکومت وایي د روان کال د جولایي په ٢٥ به پارلماني ټاکنې وشي.