تورو تیارو ځپلی ښار یو وار بیا روښانه شو!

د ننګرهار او لغمان ولایتونو د برېښنا پرې شوي مزي وتړل شول او له ۴۹ ورځو ځنډ وروسته یاد ولایتونه بېرته له برېښنا څخه برخمن شول.
د ننګرهار او لغمان ته د نغلو برېښنا کوټ څخه راتېره شوې برېښنا د لغمان د بادپښ په سیمه کې د ولسي جرګې له ټاکنو څخه وړاندې قطع شوې وه، چې له اوږدو هلو ځلو وروسته د لغمان او ننګرهار ولس او دولت په دې بریالي شول، چې د دولت د وسله والو مخالفینو له خوا د پرې شوې برېښنا مزي بېرته وتړي.
دا چې جلال اباد په ختیځ زون کې نسبتا یو صنعتي ښار دی؛ نو د برېښنا په نشتون سره پکې فابریکې او نور کار بار سخت زیانمن شوی دی، چې د برېښنا په راتګ سره به یادې ستونزې تر ډېره پورې حل شي.
د برېښنا د راپرېښودو په پار دلته په جلال اباد کې ولسونو او مدني فعالانو د ولایت مقام مخې ته په پښتونستان واټ کې د پرلت خېمه درولې وه او له دولت څخه یې د برېښنا ستونزې د دایمي او لنډ مهاله حل غوښتنې کولې.
چې د لنډ مهال لپآره د برېښنا ستونزه حل شوه او د اوږود مهاله حل لپاره یې لا هم اقدامات نه دي شوي.
تېره شپه شا او خوا لس بجې ننګرهار بېرته په برېښنا روښانه شو.
دا لومړی ځل نه دی، چې د لغمان په بادپښ سیمه کې د دولت وسله وال مخالفین د برېښنا لاینونه پرې کوي؛ بلکې له دې وړاندې هم ننګرهار او لغمان د برېښنا په پرې کولو سره تیاره بڼه خپله کړې وه