جمعه , دسمبر 4 2020
کور / خبرونه / پاکستان / دپاکستان لخوا د ټرمپ ځواب په زړو خبرو ورکول شوی

دپاکستان لخوا د ټرمپ ځواب په زړو خبرو ورکول شوی

د پاکستان د بهرنیو چارو وزیر خواجه آصف په تازه ټویټونو کې د امریکا ولسمشرډانلډ ټرمپ ته په ځواب کې ډېر سخت موقف څرګند کړی او ویلي یې دي چې “تاریخ راته وایي چې پر امریکې ړوند باور پکار نه دی”، خو د پاکستان پوځ بیا ویلي، چې د واشنګټن او اسلام اباد تر منځ غلط فهمۍ منفي اغېز کولای شي
خواجه آصف ولسمشر ټرمپ ته د هغه د وروستیو څرګندونو په ځواب کې د پاکستان هغه ټول خدمتونه خصوصاً د ترهګرۍ په ضد مبارزه یو په یوه یاد کړي، چې په تېرو اوولسو کلونو کې یې د پاکستان لپاره کړي دي. هغه په خپل یوه ټویټ کې لیکلي:
“ته پوښتنه کوې چې موږ څه کړي؟ یو پوځي آمر په ټلیفون درته تسلیم شو، وطن یې په وینو او بارودو ولمباوه، زموږ له خاورې یې پر أفغانستان د ۵۷۸۰۰ بریدونو اجازه درکړه، ستاسې پوځونو ته وسله او بارود زموږ له خاورې تېر شول، زرګونه عام خلک، پوځي سرتېري او افسران مو ستاسې په جګړه کې و وژل شول”
خواجه آصف دا څرګندونې د امریکایي ولسمشر ټرمپ د هغو څرګندونو په عکس العمل کې کړي، چې د جنورۍ په لومړۍ نېټه یې په خپل یوه ټویټ کې ویلي وو، چې پاکستان ته یې د ترهګرۍ په ضد مبارزې لپاره په تېرو ۱۵ کلونو کې ۳۳ اربه ډالره ورکړل، خو له پاکستانه یې بې له درواغو او ټګۍ هیڅ تر لاسه نه کړل.
خواجه آصف په خپلو څرګندونو کې ویلي، چې له امریکې سره د ترهګرۍ په ضد د یوه متحد هېواد په توګه تر دومره حده لاړ، چې د خپل هېواد اقتصاد يې له تباهۍ سره مخ شو. خواجه آصف په اردو ژبه په بل ټویټ کې داسې لیکلي:
“ستاسې دوښمن مو خپل دوښمن وګاڼه، ګونتانامو.بې مو [په افغان طالبانو] در ډکه کړه، ستاسې په خدمت کې دومره لاهو شو، چې خپل هېواد مو لس کاله د بجلۍ او ګېس په بحران کې پرېښوو. اقتصاد مو تباه شو خو هیله مو دا وه چې تاسې خوشاله کړو. په لکونو ویزې مو درکړې، بلیک واټر او رېمنډ ډیوس شبکه مو هر ځای خپره شوه.
د امریکې په شمول أفغانستان، هند او ځینې نور هېوادونه تل پاکستان ته ګوته نیسي، چې ترهګرو ته یې پناه ورکړې.
خو د پاکستان د حکومت برعکس پاکستاني پوځ د ټرمپ د څرګندونو په اړه ډېر تېز عکس العمل نه دی ښودلی. د پوځ ویاند مېجر جنرل آصف غفور د چارشنبې په ورځ ویلي، واشنګټن باید په دې پوه شي، چې د امریکې او پاکستان تر منځ غلط فهمۍ په سیمه خصوصاً په أفغانستان کې پر امنیتي حالاتو منفي اغېز کولای شي
د امریکایي ولسمشر ټرمپ څرګندونو ته تر اوسه د پاکستان له خوا بېلابېل ځوابونه ورکړل شوي، خو تر اوسه هیڅ یوه هم د هغو ۳۳ اربه ډالرو مرستې د خرڅولو کره شواهد نه دي وړاندې کړي، چې د ولسمشر ټرمپ په وینا د امریکې له خوا د ترهګرۍ په ضد د جګړې لپاره ورکړل شوې دي.

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

%d bloggers like this: