د استخارې لمونځ طریقه،او څه ته وایې؟

استخاره خير غوښتلو ته وايي، که یو مسلمان د کوم کار کولو اراده وکړي او د هغه په شروع کې د شک په حال کې وي، یعنې نه پوهيږي چې، پدې کار کې به زما خير وي او که شر؛ نو پداسې حال کې مسلمان ته پکار ده چې، له اللهﷻ څخه مشوره وغواړي چې، هغه مشوره د استخارې لمونځ او دعا ده.

جابر”رض” وايي:
رسول اللهﷺ به مونږ ته په ټولو کارونو کې، استخاره داسې راښودله او د هغه به يې مونږ ته داسې تعليم راکوه؛ لکه د قرآنکريم د کوم سورت. (رواه البخاري)

د استخارې لمونځ طريقه:
-لمړی به دوه رکعته نفل لمونځ وکړئ، په لومړي رکعت کې به د (الكافرون) سورت او په دوهم رکعت کې به (الإخلاص) سورت ووايئ.
له دغه لمانځه څخه ورسته به په اخلاص او ښه نيت لومړی حمد او درود شريف ووايئ او بيا به دا دعا ووایئ:
-«اللَّهُمَّ إِنِّي أَسْتَخِيرُكَ بِعلْمِكَ، وَأَسْتَقْدِرُكَ بِقُدْرَتِكَ، وَأَسَأَلكُ مِنْ فَضْلِكَ العَظيمِ، فَإِنَّكَ تَقْدِرُ وَلا أَقْدِرُ، وَتَعلَمُ وَلا أَعلَمُ، وَأَنتَ عَلاَّمُ الغُيُوبِ، اللَّهُمَّ إِنْ كُنتَ تَعلَمُ أَنَّ هَذَا الأَمرَ خَيْرٌ لي في دِينِي وَمَعِيشَتي وَعَاقِبَةِ أَمْرِي أَوْ قَالَ في عَاجِلِ أَمْرِي وَآجِلِهِ فَيَسِّرهُ لي، ثُمَّ بَارِكْ لي فِيهِ، وَإِنْ كُنتَ تَعلَمُ أَنَّ هَذَا الأَمْرَ شَرٌّ لي في دِينِي وَمَعِيشَتي وَعَاقِبَةِ أَمْرِي، أَوْ قَالَ في عَاجِلِ أَمْرِي وَآجِلِهِ فَاصْرِفْهُ عَنَّي وَاصْرِفني عَنهُ وَاقُدْرْ ليَ الخَيرَ حَيْثُ كَانَ ثُمَّ أَرضِني بِهِ»
(بخاري، مسلم او ابن ماجه)

کله چې په پورته دعا کې (هَذَا الأَمْرَ) ته ورسيدۍ، کوم کار ته چې اراده لرۍ، هغه کار به په زړه کې را وګرځوئ، بیا دعا په حمد او درود شريف پای ته ورسوئ.
که چیرې له دې څخه وروسته بيا هم شک او تردید موجود وي، اووه ځله به استخاره تکرار کړئ، بيا به د زړه ارادې ته وګورئ، که چېرې په زړه کې مو د کار کولو کلک عزم او ذوق و؛ نو هغه کار وکړئ او که په زړه کې مو د کار نه کولو او پريښودلو اراده وه؛ نو هغه کار پریږدئ.
لکه څنګه چې رسولﷺ انس”رض” ته ويلي و:
-«يَا أَنَسُ إِذَا هَمَمْتَ بِأَمْرٍ فَاسْتَخِرْ رَبَّكَ فِيهِ سَبْعَ مَرَّاتٍ، ثُمَّ اُنْظُرْ إِلَى الَّذِي يَسْبِقُ إِلَى قَلْبِكَ فَإِنَّ الْخَيْرَ فِيهِ».
(دائرة المعارف العثمانية، فيض القدير۱/۴۵۰)
ژباړه:
ای انس! کله چې ته د کوم کار په کولو کې په ترديد او شک کې وې؛ نو په هغه کې له خپل رب سره اووه ځله استخاره وکړه، بيا دې د خپل زړه ارادې ته ګوره ځکه چې، خير همدې کې دی.