د افغانستان په ګڼو ولایتونو کې د طالبانو او داعش ډلې ترمنځ جګړې روانې دي

د افغانستان په ګڼو ولایتونو کې د طالبانو او داعش ډلې ترمنځ جګړې روانې دي. لانګ وار ژورنال نشریه په خپل یوه مطلب کې لیکي، چې له څو میاشتو راهیسې د افغانستان په شمالي او ختیځو سیمو کې د طالبانو او داعش ډلې ترمنځ خونړۍ جګړې شوې دي. نشریه لیکي په دې جګړو کې له دواړو لورو سلګونه کسان وژل شوي هم دي. سرچینه زیاتوي ددغو پېښو له امله طالبان کمزوري شوي دي او تر ډېره یې تمرکز دداعش ډلې پر ضد اقداماتو باندې دی. لانګ وار ژورنال زیاتوي په جوزجان، سرپل، ننګرهار، بغلان او ځینو نورو ولایتونو کې ددواړو لورو ترمنځ خونړۍ نښتې شوې دي او ان داعش ډلې پر طالبانو ځانمرګی برید هم کړی دی. نشریه پخپل مطلب کې لیکي چې په افغانستان کې د طالبانو او حکومت ترمنځ، د حکومت داعش ترمنځ دداعش او طالبانو ترمنځ جګړو د افغانانو ژوند تریخ کړی دی او دوی ته یې ستونزې جوړې کړې دي. داعش په افغانستان کې هغه خطر دی، چې د سیمې هېوادونو ته یې اندېښنې جوړې کړې دي او ډیری پر دې باور دي، چې ایران او روسیه غواړي دداعش ډلې پر وړاندې طالبان تقویه کړي او همدې مسئلې د نیابتي جګړې د پيل وېره ډېره کړې ده.