د امریکا دوه لوړ پوړي چارواکي پاکستان ته ځي

راپورونه وایي د امریکا دوه اغیزناکې څېرې له پاکستاني چارواکو سره د خبرو لپاره اسلام اباد ته ځي. یادې څرګندونې د امریکا د دفاع وزیر جیمز متیس په پنټاګون کې له خبریالانو سره په خبرو کې کړې دي. هغه زیاته کړې چې تمه ده راتلونکې اونۍ به د امریکا د بهرینو چارو وزیر مایک پومپیو او جنرال جوزف ډنفورډ پاکستان ته سفر وکړي. د یادو خبرو موخه له تروریزم سره پر جدي مبارزې د امریکا ټینګار دی. یاد امریکایي پلاوی په داسې حال کې اسلام اباد ته ځي چې په دې وروستیو کې په پاکستان کې د رهبرۍ په کچه ژور تغیرات راغلي دي او څو ورځې وړاندې داسې اوازې هم خپرې شوې چې امریکایي چارواکو عمران خان ته ټلفون کړی دی او له هغه نه یې غوښتي چې باید له تروریزم سره پیاوړې او کارنده مبارزه وکړي، چې وروسته بیا پاکستان دا خبرې رد کړې او له امریکا یې هم د خپلو خبرو د بېرته اخیستلو هیله وکړه خو واشنګټن وویل چې دوی پر خپلو خبرو ولاړ دي او پاکستان باید له تروریزم سره رښتینې مبارزه وکړي.