د بریتانیا د بهرنیو چارو وزیر بوریس جانسون داسې مهال استعفی وکړه چې د دغه هېواد د صدراعظمې ټرزا مې په حکومت کې ګډوډۍ ډېرې شوي دي.
د نوموړي تردې اعلان څو ساعته دمخه د بریتانیا د حکومت یو بل لوړ پوړی چارواکی ډیوېد ډېوېس چې له اروپایې ټولنې څخه د بریتانیا د وتلو لوړ پوړی مرکچي وو، هم له دندې لېرې شو.
د ټرزا مې دفتر پرون په یوې اعلامیې کې وویل چې تر غرمې وروسته صدارعظمې د بوریس جانسون استعفی منظور کړه.
مې وروسته اعلان وکړ چې د هغې یو بل ډېر پیاوړی پلوی، د عامې روغتیا وزیر جیرمي هانت Jeremy Hunt د جانسون د ځای ناستي په توګه نومول شوی دی.
بورېس جانسون او ډیوېد ډېوېس د صدراعظمې ټرزا مې د کابینې هغه دوه مخکښ وزیران وو چې له اروپایي ټولنې د بریتانیا د وتلو پر مسئله یې له نوموړې سره ښکاره مخالفتونه درلودل.
دوی وایي، مې له اروپایي مشرانو سره د یادې موضوع په اړه د خبرو پر وخت ډېره نرمي کوي او دا ډول چلند د بریتانیا ملي ګټې په خطر کې اچوي.
