د ټرمپ نا سمو تګلارو د هېواد وضعیت کړکېچن کړی دی

سي ان ان په یوه راپور کې ویلي چې د ټرمپ له تګلارې سره نه یوازې دا چې طالبان کمزوري شوي نه دي، بلکې دغه ډله پیاوړې شوې ده، وضعیت کړکېچن شوی دی او طالبانو تهاجمي حالت خپل کړی دی. په راپور کې راځي طالبان د سیمو په ساتلو کې ناکامېږي خو دوی دومره پياوړي شوي چې ان پر لویو ښارونو بریدونه کوي. سي ان ان د ټرمپ تګلاره کارنده نه بولي او وايي چې لا هم په افغانستان کې اوولس کلنه جګړه روانه ده، افغان پوځيان او بهرني ځواکونه تلفات ورکوي خو ددغه کړکېچ د پای څرک تر دې دمه نه ښکاري. یادې رسنۍ د افغان جګړې په اړه د یوه څېړونکي سکاټ ډېس ماریس له خولې لیکلي چې په افغانستان کې وضعیت کړکېچن دی او د ټرمپ تګلاره هم له ناکامۍ سره مخ ده. نوموړي ویلي دا سمه ده، چې د افغان جګړې د پای لپاره دیپلوماتیکې لارې مناسبې دي، خو داسې ښکاري چې امریکا په دې برخه کې هم ټول اړخونه نه دي ارزولي او ښايي د سولې هڅې هم دومره ژر تر بریا و نه رسېږي.