د پاکستان څارګري اداري افغان کډوال ترهګر بولي

پاکستان دغه هېواد کې مېشتو افغان کډوالو ته د اوسېدو له پاره د روانې جنورۍ میاشتې وروستۍ ورځې پورې وخت ورکړی دی.

افغان چارواکي هڅه کوي، څو دغه موده وغځوي. په دې اړه يې له پاکستاني چارواکو او د ملګرو ملتونو د کډوالو ادارې سره خبرې هم روانې دي؛ خو تر اوسه يې مثبت ځواب نه دی ترلاسه کړی. په داسې حال کې چې د اوسېدو د مودې پای ته رسېدو ته یوازې دولس ورځې پاتې دي.

پرون د پېښور د رسنیو مرکز کې افغان کډوالو یوه خبري غونډه رابللې وه. دغه راز افغان سفیر عمر زاخېلوال هم پېښور ته تللی و او هلته يې له کډوالو سره کتلي وو. سفیر افغان کډوال خپل وطن ته تللو ته وهڅول.

خو پاکستان کې مېشتو کډوالو بیا ویل تر هغو چې يې وطن کې سوله نه وي راغلې، دوی ته دې پاکستان کې د اوسېدو اجازه ورکړل شي. د دوی یو شمېر مشرانو یې رسنیو سره خبرو کې ویلي چې د دوی بېرته تګ افغانستان کې له سولې او امنیت سره تړلی دی.

پاکستان وايي چې افغان کډوال د دوی ملي امنیت ته ګواښ دی؛ خو کډوالو دا خبرې هم رد کړې چې ګنې افغان کډوال دې په امنیتي پېښو کې ښکېل وي. دوی وايي د پولیسو ثبت شوي راپورونه ښيي چې افغان کډوال د ناامنۍ په پېښو کې ښکېل نه دي.

پاکستان کې شاوخوا دوه نیم میلیونه افغان کډوال اوسېږي چې نږدې یو نیم میلیونه يې راجستر او نور يې غېر راجستر دي.

افغان حکومت وايي چې په دغومره لږه موده کې د دغومره ډېرو کډوالو راتلل او هلته ځای په ځای کول ډېر ستونزمن دي. خپله مېشت کډوال هم وايي چې په دغومره لږه موده کې د دوی تلل او خپله کاروبارونه لېږدول له ستونزې ډک کار دی.