دوشنبه , مارچ 1 2021
کور / خبرونه / طالبانو له امریکایي استازي سره لېدنه کړې ده

طالبانو له امریکایي استازي سره لېدنه کړې ده

طالبانو په رسمي توګه ومنله چې په قطر کې يې د امريکا له ځانګړي استازي زلمي خليلزاد سره ليدلي دي.

مخکې له دې امريکايي رسنيو خبر ورکړى و چې قطر ته د سفر پر مهال خليلزاد له طالبانو سره هم کتلي دي.

د طالبانو د وياند ذبيح الله مجاهد له خوا د تلې په ٢١مه په يوه خپره شوې خبرپاڼه کې راغلي چې په قطر کې د دوى د سياسي دفتر مشر او غړو د امريکا له مذاکراتي پلاوي سره ليدلي دي.

سرچينې زياته کړې چې د دوى په پلاوي کې د سیاسي دفتر رييس شېرمحمد عباس ستانکزی، د سیاسي دفتر مرستیال مولوي عبدالسلام حنفي، د سیاسي دفتر غړو شهاب الدین دلاور، قاري دین محمد حنیف، محمد زاهد احمدزی او محمد سهیل شاهین شامل وو.

طالبانو ويلي چې د امریکا له مذاکراتي ټیم سره چې مشري يې د افغانستان لپاره د امریکا ځانګړي استازي ډاکتر زلمي خلیلزاد کوله، دا ليدنه وړمه ورځ د قطر په پلازمېنه دوحه کې شوې ده.

په خبرپاڼه کې راغلي چې په دې ليدنه کې له افغانستانه د بهرنيو ځواکونو پر وتلو او د افغان مسئلې پر سوله ييزې حللارې خبرې وشوې.

طالبانو ويلي، د دوى پلاوي د مشکلاتو د حل او واقعي امن په راتلو کې د بهرنيو ځواکونو پاتې کېدل لوی خنډ وباله او زياته يې کړه چې افغانستان يو اسلامي هېواد دی او دا هېواد خپل اسلامي ارزښتونه او ثقافت لري.

سرچينې زياته کړې، د دغو ټکو په پام کې نیولو سره دې د واقعي او افغان شموله حل لپاره هڅې وشي.

طالبانو ويلي، په پای کي دواړو لورو موافقه وکړه چې خپلو غونډو ته به دوام ورکوي.

د يادونې ده چې څلور مياشتې مخکې هم د امريکا د بهرنيو چارو وزارت يوې مرستيالې الېس وېلز په قطر کې له طالبانو سره ليدلي وو، خو طالبانو دا لیدنه نه وه تاييد کړې.

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *