عطاءمحمد نور د افغان حکومت ضد مظاهرې لغوه کړي

د بلخ ګوښه شوي والي عطا محمد نور چې پلان یې درلود، د حکومت پر ضد د هېواد په پنځلس ولایتونو کې مظاهرې وکړي، د نړیوالې ټولنې په غوښتنه يې دغه مظاهرې لغوه کړي دي.

افغانستان کې د اسوسییټيډ پریس خبري اژانس خبریال مسعود حسیني پر خپل ټوېټر لیکلي چې عطا نور دغه مظاهرې لغوه کړي او نن يې خبریالان د مالوماتو ورکولو له پاره ورغوښتي دي.

د طلوع نیوز خبریالې صالحې سادات هم پر خپل ټوېټر دغه مالومات خپاره کړي دي.

عطا نور چې د ولسمشر له لوري د ده منل شوې استعفی نه مني او خپلې دندې ته يې دوام ورکړی، پنځلس ولایتونو کې يې درې ورځینۍ مظاهرې پلان کړې وې.

عطا نور چې د جمعیت ګوند اجراییه مشر هم دی، وروستیو کې يې پر ولسمشر غني توندې نیوکې کړي او ګواښ يې ورته کړی چې د خلکو په زور به یې له ارګ څخه وباسي.

دوه ورځې وړاندې د حکومت نور سیاسي مخالفین هم بلخ ته تللي وو. په دوی کې د ولسي جرګې غړي ظاهر قدیر، همایون همایون او د ملي امنیت پخوانی مشر رحمت الله نبیل شامل وو. دا چې دوی په کومو مسئلو خبرې کړي، په رسمي ډول يې څه نه دي ویل شوي.