دوشنبه , جون 1 2020
کور / خبرونه / بين المللي / ولسمشر ترمپ غواړي په امریکا کې د وسلې لرلو حق خوندي وساتي

ولسمشر ترمپ غواړي په امریکا کې د وسلې لرلو حق خوندي وساتي

ولسمشر دونالد ترمپ د وسلو د ملي ټولنې جرګه ګۍ ته ویلي چې د خپلې ولسمشرۍ په موده کې به د وسلو قانون سخت نه کړي. په امریکا کې د پارکلنډ په ښوونځي کې تر ډزو وروسته، ترمپ د وسلو د لابي پر ضد د اقداماتو زیګنال ورکړی وو.

د جمعې په ورځ د امریکا متحده ایالاتو ولسمشر دونالد ترمپ د وسلې ملې ټولنې یا «ان. آر. اې» ته وویل چې د وسلو لرو حق د دموکراتانو له خوا تر تهدید لاندې دی او ټینګار وکړ چې دی به د دې حق پر خوندي پاتې کیدو ځان ډاډه کړي.

د متحده ایالاتو د ټکزاس ایالت په ډالاس ښار کې ولسمشر ترمپ د خبرو پر مهال د پارک لنډ د ښوونځي ډزو ته په اشاره کولو سره پر خپل هغه پخواني دریځ یو ځل بیا ټینګار وکړ چې غواړي روزل شوي ښوونکي پټې وسلې له ځانه سره ولري.

د وسلو د ملي ټولنې کلنۍ غونډې ته ولسمشر ترمپ په خپله وینا کې وویل چې د امریکایي اتباعو له خوا د وسلو د لرلو او حملولو حق، چې د دې هیواد په اساسي قانون کې تضمین شوی دی تر ګواښ لاندې دی. ترمپ زیاته کړه: «خو تر هغه وخته پورې چې زه ولسمشر یم ستاسې دغه حق به هیڅ وخت هم له ګواښ سره مخ نه شي.»

د ولسمشر ترمپ دغه تازه څرګندونې د فبروري میاشتې په وروستیو کې د امریکا متحده ایالاتو د فلوریډا ایالت د پارک لنډ په ښوونځي کې تر ډزو او برید وروسته د امریکا د پارلمان له استازو سره په ګډه د هغه له خبرو سره په ټکر کې دي. په هغه ناسته کې چې په تلویزیون کې هم خپره شوې وه، ترمپ د جمهوري غوښتونکو پر سناتور پاټ ټومي، سختې نیوکې وکړې او ویلي یې وو چې هغه د «ان. آر. اې» څخه ویره لري.

د امریکا په کانګرس کې دموکراتانو د وسلو د لرلو په هکله د مشخصو پالیسو رامنځ ته کیدو غوښتنه کړې چې په کې د یو کس په هکله د معلومات راټولول او د پوځي وسلو پر پلورلو باندې بندیز لګول شامل دي. د دوی په وینا دغه راز پالیسي د امریکا له اساسي قانون سره په ټکر کې نه دي.

په امریکا متحده ایالاتو کې د فبروري میاشتې د پارک لنډ په ښوونځي په پیښه کې ۱۷ کسان ووژل شول، خو بیا هم د وسلو د بندیز کوم نوی قانون نه دی معرفي شوی. خو ترمپ ویلي وو چې هغه به په دې هکله لاس په اقدام پورې کړي. د پارک لنډ په ښوونځي کې عام وژنه د دې سبب شوه چې ژوندي پاتې شوي زده کوونکي د وسلو د لرلو پر ضد په پراخو لاریونونو لاس پورې کړي.

زیاته شوې وه چې د ترمپ اداره ښايي پر نیمه اتومات وسلو باندې بندیز وضع کړي. د دې اقدام تر شا یو دلیل په امریکا متحده ایالاتو کې د ۲۰۱۷ م کال د اکتوبر میاشتې د ډزو هغه پیښه وه چې د یوې نیمه اتومات وسلې یوه بریدګر ۵۹ کسان په ډزو ووژل.

د «ان. آر. اې» یا د امریکا د وسلو ملي ټولنې ته ولسمشر ترمپ په خپله وینا کې د ۲۰۱۵م کال د نومبر میاشتې د پاریس برید ته هم اشاره وکړه چې په کې ‍۱۳۰ کسان وژل شوي وو. ترمپ وویل چې دغه راز وژنې ان په داسې ښارونو او هیوادونو کې هم پیښیږي چې د وسلې تر ټولو سخت قوانین لري. ولسمشر ترمپ زیاته کړه چې که چیرته د پاریس د تیاتر یوه کارکوونکي هم وسله لرلی نو دغې سناریو به چې ګڼ شمیر کسان ووژل شول، تغیر کړی وو.

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

%d bloggers like this: