افغانستان لپاره د امریکا ځانګړي څارونکی یا سیګار وایي له ۲۰۰۱ کال راهیسې د افغانستان نا امنه سیمو کې د جنګ ارامولو لپاره د امریکا ټولې هڅې ناکامې دي.
د سیګار نوی راپور چې د پنجشنبې په ورځ خپور شوی پکې ویل شوي چې امريکا د تېرو ١٧ کلونو په اوږدو کې د افغانستان ځينو سيمو ته د ثبات راوستو لپاره ميلياردونه ډالر ضايعې کړي. د سيګار په وينا افغانستان کې ناسمې تګلارې د دغو ميلياردو ډالرو د بې ځايه لګېدو لامل شوې.
رپوټ وايي له وسله والو پاکو شويو سيمو د بيا رغونې او ټيکاومنولو لپاره امريکايي چارواکو په تېرو ١٧ کلونو کې ٧.٤ ميليارد ډالر لګولي چې په وينا يې هېڅ پايله يې نه ده لرلې.
رپوټ زياتوي د دغو پيسو يوه برخه د فاسدو چارواکو لاس ته ورغلې ده او نوره په داسې پروژو لګیدلې ده چې هیڅ ګټه یې نشته.
راپور کې دا هم ویل شوي چې پر افغانستان د امریکایی ځواکونو بمبارې زیاته شوې ده،د امنیتي ځواکونو شمیر کم شوی او د ۴۵ سلنه سرتیرو د وینې ګروپ هم معلوم نه دی.
راپور کې ویل شوي چې امریکا له ۲۰۰۱ کال راهیسې د افغانستان نا امنو سیمو امنیت خوندي کولو کې تر زیات فشار لاندې وه، له همدې امله یې دې موخې ته د رسیدو لپاره یې زیاتي پیسې په افغانستان کې ولګولې، په داسې حال کې چې افغانستان دغو پیسو جذبولو لپاره چمتوالی او ظرفیت نه درلود.
