په کونړ کې په یوه هوايي برید کې لسګونه ملکي خلک وژل شوي ـ

په کونړ کې په یوه هوايي برید کې ملکي خلک وژل شوي

د کونړ والي دفتر د دغه ولایت شلتن ولسوالۍ کې د هوايي بمبارۍ له کبله د ملکي خلکو مرګ ژوبله تایید کړې، خو د سر اوښتي زیان کره شمېره یې نه ده یاده کړې. وسله والو طالبانو د يوې اعلاميې په خپرولو سره په عملیاتو کې وژل شوي کسان ملکیان بللي دي بل لور ته د کونړ د ځايي روغتون مسوولین وايي، د پېښې له ځایه ۱۵ ټپيان وروړل شوي دي.

د روغتون مشر عزیز الرحمان ساپي ویلي، ټپیانو کې اته ماشومان او درې ښځې دي. د کونړ د والي ویاند غنی مصمم وایي، عملیات د معاویه په نوم د حکومت یوه وسله وال مخالف پر کور شوي چې په کې د ۲۰ په شاوخوا کې د القاعده او طالبانو غړي وژل شوي دي.

مصمم وایي، برید کې ملکیانو ته هم مرګ ژوبله اوښتې چې کره شمېر یې لا دوی ته نه ده معلومه د سیمې یوه اوسېدونکي بي بي سي ته ویلي، په پېښه کې پر څلورو یا پنځو کورنو برید شوی او پخپله یې د ښځو او ماشومانو دېرش جسدونه لیدلي دي.

ځايي خلکو ویلي، تېره شپه يې سيمه کې تر څلورو ساعتونو پورې د الوتکو د ګرځېدو او بمبار غږونه اورېدلي دي.