پنجشنبه , مارچ 4 2021
کور / خبرونه / کندهار: پاکستان لخوا پر ډیورنډ کرښه د اغزن تار لګولو مخه نیول شوې ده

کندهار: پاکستان لخوا پر ډیورنډ کرښه د اغزن تار لګولو مخه نیول شوې ده

افغان ځواکونو په کندهار کې د پاکستاني عسکرو له لوري د کټارو جوړولو مخنیوی کړی دی. په کندهار کې ځايي خبریالان وايي چې د کندهار امنیه قومندان تېره شپه د هغه پایې ایستلې دي چې پاکستان غوښتل اغزن سیم ورباندې وغځوي. د راپورونو له مخې پاکستاني عسکرو غوښتل د کندهار ولایت د سپین بولدک او ښوراوک ولسوالیو ترمنځ د سرو څاهانو په سیمه کې اغزن سیم تېر کړي. افغان سرتېرو د پاکستاني عسکرو ددې کار مخنیوی کړی دی. ددې کار په مقابل کې پاکستاني عسکرو افغان ځواکونو د جګړې خبرداری ورکړی، خو افغان سرتېرو یې پروا نه ده کړې او ددوی د کار مخنیوی یې کړی دی. د کندهار امنیه قومندان جنرال رازق هم امر کړی، چې د پاکستاني عسکرو له لوري جوړې شوې پایې باید ژر تر ژره و ایستل شي. پاکستاني عسکرو په سیمه کې ځايي امنیتي او دفاعي ځواکونو ته د خبرو وړاندیز کړی دی، خو دوی یې وړاندیز نه دی منلی او ویلي یې دي، چې دوی ته به په سیمه کې د اغزن سیم د غځولو اجازه ور نه کړي. پاکستان له څو میاشتو راهیسې پر ډیورنډ فرضي کرښه د اغزن سیم د غځولو چارې پيل کړې دي، چې افغان حکومت غیر قانوني بللې دي او دغه خط یې غیر رسمي او نا منل شوې پوله بللې ده.

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *