یکشنبه , جون 24 2018
کور / خبرونه / پاکستان / په کراچۍ کې د پښتون ژغورنې غورځنګ نهه کسان اوچت کړی شوي

په کراچۍ کې د پښتون ژغورنې غورځنګ نهه کسان اوچت کړی شوي

پاکستان کې د کيڼ اړخه ځوانانو سازمان ويلي په کراچۍ کې د پښتون ژغورنې غورځنګ (پي ټي اېم) په ملاتړ د احتجاجي مظاهرو کولو وروستو يې نهه کسان اوچت کړی شوي او لا درکه دي.

د مترقي ځوانانوسازمان ويلي په کراچۍ کې يې اووه کسان د اتوار په ورځ او څلور نور بيا د سه شنبې/ نهې په ورځ د مظاهرې وروستو نيول شوي دي.

د پي ټي اېم مشر منظور پشتين پرون د سه شنبې/ نهې په ورځ په فېس بک په کراچۍ کې د نيول شوؤ کسانو په اړوند پېغام ورکړی او ګواښ يې کړی دی که دا کسان خوشي نه کړی شو دوي به په ټول پاکستان کې کاربنديز اعلان کړي.

پشتين لیکلي “د پروني احتجاج نه وروستو تراوسه پورې په کراچۍ کې د پي ټي اېم په حق کې احتجاج کوونکي د رېنجرز ځواک په بند کې دي، او که د سبا پورې خوشي نه کړی شو نو په ټول پاکستان کې به پهيه جام کاربنديز دپاره د خلکو سره رابطې کوو”.

په کراچۍ کې مظاهره راجوړؤنکې انعم خان چې د سازمان د ښځو د څانګې مشري کوي روئټرز ته ویلي د سه شنبې په ورځ نیول شوؤ کسانو کې دوه بيا پرېښودی شوي دي.

په کراچۍ کې د پښتونخوا ملي عوامي ګوند د زده کوونکو سازمان (پي اېس او) هم ويلي د اتوار په ورځ مظاهره کې ګډون کوونکی د دوي د يو ځوان د اوچتولو هڅه هم شوې خو هغه ترې په تېښته کې بريالی شوی د هغه نه په سپينو جامو کې دوه کسانو موبايل اخستی او موټرسائيکل یې ترې بوتللی دی.

په کراچۍ کې د اتوار د ورځې مظاهره وروستو له هغې راجوړه شوې چې د خالي په ماښام لاهور کې پولیسو د پي ټي اېم هغه څو مشران ونيول څوک چې په لاهور کې د اتوار د ورځې د پي ټي اېم د جلسې په تياريانو بوخت وو.

د پي ټي اېم د دغو نيولو شوؤ کسانو چې څو ساعته وروستو بيا راخوشي کړی شوي وو خو په ټول ملک کې د دغو کسانو د نيولو پرضد او پي ټي اېم د ملاتړ دپاره احتجاجي مظاهرې اعلان شوې وې.

په کراچۍ کې د نيول شوؤ کسانو په اړوند رېنجرز ځواک څه نه دي ویلي او پوليس وايي دوي په دغه اړوند هيڅ مالومات نه لري.

د خالي په شپه لاهور کې د پي ټي اېم د مشرانو د نيولو وروستو منظور پشتين په خپله په خلکو غږ کړی ؤ چې نه يواځې پاکستان بلکې په ګرده نړۍ کې دې احتجاج ریکارډ کړي چې د پاکستان رياست دوي پرامنه کسان نيول کیږي.

د پي ټي اېم غړو او پلويانو له دې وړاندې هم په کراچۍ کې احتجاجي مظاهرې کړي خو په لمړي ځل يې د کسانو نيولو خبر مخې ته راغلی دی.

د پي ټي اېم په ملاتړ کې نه يواځې د پاکستان په زیاترو ښارونو کې بلکې په افغانستان ، امریکا او يورپي هېوادونو کې هم مظاهرې شوي دي.

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *