اینډیپنډنټ فارسي: افغانستان اوس هم د بهرنیو هېوادونو مرستې ته اړتیا لري

د بریتانیا د انډيپنډنټ فارسي ژبې ورځپاڼې له طالبانو، القاعدې او داعش ډلو سره د مبارزې په اړه د افغانستان د اجراییه رییس عبدالله عبدالله پر تازه څرګندونو تمرکز کړی دی.
ښاغلي عبدالله له سي ان ان ټلویزیوني شبکې سره په خبرو کې ټینګار کړی چې په افغانستان کې د تروریستي ډلو د له منځه وړلو لپاره افغان پوځیان د ناټو ملاتړ ته سخته اړتیا لري.
د ناټو غړیو هېوادونو دفاع وزیرانو تېره اوونۍ په بروکسل کې تر ۲۰۲۴ کاله پورې د افغانستان له امنیتي ځواکونو د ملاتړ ډاډ ورکړ.
د ناټو یوه چارواکي چې غواړي نوم یې خپور نه شي ازادي راډیو ته ویلي، د افغانستان د پوځ کلنی لګښت پنځه میلیارده ډالر کیږي او زیاته برخه یې متحده ایالتونه ورکوي.
انډيپنډنټ فارسي ورځپاڼې د یوه افغان سیاسي کارپوه نجیب حقجو په حواله لیکلي چې د اتلس کاله مخکې په څېر لا هم افغان پوځیان د بهرنیو ځواکونو حضور او مرستې ته اړتیا لري، ترڅو له تروریستي ډلو سره وجنګیږي او هغوی له منځه یوسي.
ښاغلی حقجو دا هم وایي چې که ناټو او نړیوال شریکان یې له افغانانو او د افغانستان له حکومت سره له مشورتې پرته له دغه هېواده د وتلو پرېکړه وکړي، د تاریخ تر ټولو لویه تېروتنه به وکړي؛ ځکه د حقجو په باور تروریستي ډلې تر پخوا لا قوي شوي او سختې او اوږدې جګړې ته ورسره ضرورت دی.