د پاکستان یو شمېر سیمې یوې زورورې زلزلې لړزولي

د خیبر پښتونخوا په بیلابیلو سیمو اؤ پلازمینه اسلام اباد کې د دوشنبې په سهار بیا یوه زوروره زلزله راغلې چې ودانۍ یې لړزولي خو تر اوسه دې زلزله کې د څه رقم ځاني زیان مالومات مخې ته نه دي راغلي.
د زلزلې دا لړزېدل سهار په شپږ بجې اؤ ۱۱ؤ دقیقو پېښور ،ملاکنډ ،چارسده، ،مردان، وزیرستان، دیر،چترال،نوښار، مانسهره،بټګرام،پېنډۍ اؤ اسلام اباد کې محسوس کړل شوي دي.
د زلزلو دڅار د ادارې له مخې ددې زلزلې شدت5.8 ثبت کړل شوی اؤ مرکز یې د هندوکش دغرونو په لړۍ افغانستان کې د زمکې د لاندې 157 کلومیټره ژور ښودل شوی.
دبیلابیلو سیمو څخه د ډیوه خبریالان وایي چې د زلزلې له امله په خلکو کې سخته ویره خوره شوې اؤ له کورونو په منډه وتلي خو وایي تر اوسه ددې زلزلې له امله د شوؤ زیانونو اطلاعات مخې ته نه دي راغلي.
له دې وړاندې دتیرې میاشتې په ۲۴مه نېټه هم په خیبر پښتونخوا اؤ دپاکستان د واک لاندې کشمیر کې د 5.8 شدت یوه زوروره زلزله راغلې وه چې ۳۸کسان پکې مړه شوي اؤ د۴۰۰ نه زیات نور ژوبل شوي وؤ.
ددغه زلزلې نه دوه ورځې وروسته په ۲۶م ستمبر بیا دپاکستان دانتظام لاندې کشمیر کې د زلزلې یوې بل زورور جړق شاوخوا پینځوس کسان ژوبل کړي وؤ.
په دغو زلزلو کې زیاته تباهي دکشمیر په میرپور سیمه کې شوې وه چې په سوونو ودانۍ ،پلونه،سړکونه اؤ مارکیټونه یې ړنګ کړي وؤ.