له دې وروسته افغانان په پاکستان دوه میاشتې وخت تیرولی شي

په کابل کې د پاکستان سفير وايي چې دوى افغانانو ته د ويزې برخه کې د ډېرو اسانتياوو پر يو پلان کار پيل کړى دى.

دغه څرګندونې د پاکستان سفير زاهد نصرالله خان د سلواغې په ٦مه په کابل کې د دغه هېواد د سکالرشیپونو لپاره له افغان زده کوونکو د ازموينې پر مهال رسنيو ته وکړې.

هغه زياته کړه چې پاکستان افغان زده کوونکو لپاره درې زره سکالرشيپونه د پنځو کلونو لپاره اعلان کړي وو.

نوموړي وويل چې سږ کال به ٨٠٠ افغان زده کوونکي په بېلابېلو برخو کې د دوکتورا، ماسترۍ او ليسانس لپاره پاکستان ته لېږدول کېږي.

سفير وايي چې د ازموينې دغه پروسه ډېره شفافه ده، له اسلام اباده د لوړو زده کړو ادارې د يو پلاوي پر وړاندې اخيستل کېږي.

ده زياته کړه چې سږ کال په کابل، جلال اباد، کندهار، مزارشريف او هرات ښارونو کې شاوخوا لس زره افغان زده کوونکي په دغو ازموينو کې برخه اخلي.

نصرالله خان هغه ادعاوې رد کړې چې ګواکې په سکالرشيپونو کې پيسې اخيستل کېږي او ويې ويل چې دا پروسه دومره رڼه ده چې په کې د درغلۍ او فساد هېڅ امکان نشته.

سفير وويل چې سږ کال يې د افغان نجونو لپاره سل ځانګړي سکالرشيپونه جلا کړي دي.

د پاکستان سفير دغه راز وويل چې له افغانستان سره د پاکستان د ١،٧ ميليارده کلدارو په ارزښت د مرسته شوو ٤٠زره ټنه غنمو لېږدول هم تېره اوونۍ بشپړ شوي دي.

د هغه په وينا، څو مياشتې مخکې کابل ته د سفر پر مهال د پاکستان د بهرنيو چارو وزير شاه محمود قريشي د دې مرستې اعلان کړى و.

ده زياته کړه چې دا غنم به وچکالۍ ځپلو کورنيو ته ورکول کېږي.

د پاکستان ويزو ترلاسه کولو او په تورخم کې د افغان مسافرو د ستونزو په اړه د يوې پوښتنې په ځواب کې سفير زاهد نصرالله خان وويل چې دوى په روان کال کې د دې ستونزو د هواري لپاره پر يو پلان کار جوړ پیل دى.

هغه زياته کړه چې په کابل او اسلام اباد کې دوی د ويزې د متقاضيانو لپاره د ځاى پر جوړولو کار پيل کړى چې له بشپړېدو سره به يې ډېرو خلکو ته د ويزې اسانتيا برابره شي.

د نوموړي په وينا، پاکستان په تېر زېږديز کال کې افغانانو ته ٧٤٢زره وړيا ويزې ورکړې دي چې هېڅ بل هېواد دومره ويزې نه دي ورکړې.

دى وايي چې پاکستان هره ورځ شاوخوا څلور زره ويزې افغانانو ته ورکوي، خو ورځ تر بلې د متقاضيانو شمېر زياتېږي.

سفير زياتوي: ((موږ هڅه کوو چې د خپلو کارمندانو شمېر زيات کړو، خو هره ورځ د خلکو شمېر زياتېږي چې له امله يې ګڼه ګوڼه زياته شوې ده.))

د پاکستان سفير وايي، دوى خلکو ته د شپږ مياشتې ويزه ورکوي، خو ويزه اخيستونکى بايد هلته يوه مياشت پاتې شي، خو د دوى د پلان له مخې به له دې وروسته هر افغان تر دوو مياشتو پورې په پاکستان کې پاتې کېداى شي.

هغه دا ژمنه وکړه چې په تورخم کې د (دخولي او خروجي) وهلو په برخه کې د کار کوونکو شمېر زياتولو سره دا ستونزه هواره کړي.