ټرمپ ترکیې ته خبرداری ورکړی چې اقتصاد به یې فلج کړي. د امریکا ولسمشر یوه ورځ تر هغه وروسته چې له سوریې یې د خپلو عسکرو د ایستلو پرېکړه وکړه ویلي، ترکیه حق نه لري چې په سوریه کې د کورد وسله والو پر ضد عملیات پيل کړي. دده په خبره که ترکیه دا کار وکړي نو دوی به یې اقتصاد په بشپړه توګه ختم او تباه کړي. ټرمپ ویلي د کوردانو پر ضد د ترکیې عملیات له حده د وتلو په مانا ده. ترکیې تېره ورځ اعلان کړی و، چې د سوریې په ځينو برخو کې به د وسله والو ترهګرو پر ضد عملیات کوي. د ترکیې موخه هغه کورد وسله وال دي چې امریکا یې ملاتړ کوي. ترکیې دغه وسله والو ته د ترهګرو په سترګه ګوري. یاد کوردان له کلونو راهیسې مبارزه کوي او له ترکیې د خپلواکۍ غوښتونکي دي.
