ولسمشر غني تېر ماښام په ابوظبۍ ښار کې د متحده عربي اماراتو د بهرنيو چارو او نړيوالو همکاريو له وزير شيخ عبدالله بن زايد ال نهيان سره وليدل. ارګ وايي، په دې ليدنه كې دواړو لورو د ستراتېژيکو اړيکو او همداراز د افغانستان او متحده عربي اماراتو ترمنځ د سوداګريزو او اقتصادي مناسباتو پر پراختيا او سيمه ييزو مسايلو بحث وكړ. بلخوا تېر مازديګر د ملګرو ملتونو سازمان د سرمنشي مرستيالې او د يو اېن هبيتات موسسې اجرايوي ریيسې ميمونې محمد شريف هم په متحده عربي اماراتو كې له افغان ولسمشر غني سره ليدلي دي. هغې ژمنه كړې، چې په افغانستان کې به د دې ادارې فعاليتونه د ښاري پراختيا د لومړيتوبونو پر بنسټ تنظيم شي او دوى به په ياده برخه کې پر يوې طرحې کار وکړي او هغه به له افغان حکومت سره شريکه کړي.
