جمعه , اکتوبر 30 2020
کور / خبرونه / افغانستان / امریکایي ځواکونو په هلمند کې په طالبانو برید کړی

امریکایي ځواکونو په هلمند کې په طالبانو برید کړی

امریکایي ځواکونو د تیرو دوو ورځو په ترڅ کې د هلمند په ولایت کې پر طالب جنګیالیو باندې “هدفي بریدونه” کړي دي.
په افغانستان کې د امریکایي ځواکونو ویاند سوني لګیټ، په خپل ټویټر پاڼه لیکلي دي چې دغه بریدونه د افغان ځواکونو څخه د دفاع په خاطر شوي چې طالبانو پرې بریدونه کړي وو.
ښاغلي لګیټ زیاته کړې ده چې: “دا [د امریکایي ځواکونو بریدونه] د امریکا-طالبانو د موافقې سره سمون لري. امریکایي ځواکونو دمخه هم د طالبانو تر بریدونو لاندې د افغان قواو ملاتړ کړی او په راتلونکې کې به یې هم وکړي.”

د امریکایي ځواکونو دغه ویاند همداشان د ناټو د قاطع ماموریت د قوماندان سکات میلر، له خولې ویلي چې د طالبانو بریدونه د دوحې له موافقې سره سمون نلري.
هغه ویلي دي: “طالبان باید سمدستي په هلمند کې خپل بریدګر اقدامات بند کړي او په ټول دغه هیواد کې تاوتریخوالی راکم کړي. دغه بریدونه د امریکا-طالبانو د موافقې سره سر نه لګوي او د افغانستان د سولې روان مذاکرات کمزوري کوي.”

دمخه تر دې سکات میلر طالبانو ته خبرداری ورکړی و چې د تاوتریخوالي د نه کمولو په صورت کې دې غبرګون ته په تمه اوسي.
طالبانو د دوو تیرو ورځو راهیسې د هلمند په مرکز لښکرګاه باندې خپلو بریدونو ته زور ورکړی او د رپوټونو له مخې د کندهار-هلمند لویه لاره د ټرافیک پرمخ تړل شوې ده.
د افغانستان د جمهوري ریاست ویاند صدیق صدیقي نن په یو خبري کنفرانس کې وویل چې تازه ځواکونه هلمند ته رسیدلي او ژر به طالبان هلته وکوبي.
هغه زیاته کړه چې طالبانو د بریدونو تر څنګ د سړکونو او د بریښنا د یو بند په ویجاړولو هم لاس پورې کړی دی.

ښاغلي صدیقي وویل چې افغان کماندو ځواکونه هم هلمند ته رسیدلي او طالبانو ته یې مرګ ژوبله اړولې ده.
په افغانستان کې د طالبانو بریدونه پداسې حال کې زیات شوي چې د امریکا د متحده ایالاتو، ناټو، اروپایي ټولنې او ملګرو ملتونو په ګډون نړیواله ټولنه په افغانستان کې د تاوتریخوالي زیاتیدل د منلو وړ نه بولي او د افغانستان د حکومت او د طالبانو له ډلې نه یې غوښتي چې ژر تر ژره اوربند وکړي.

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

%d bloggers like this: