دوشنبه , سپتمبر 21 2020
کور / خبرونه / افغانستان / بین لافغاني خبرې او د طالبانو او حکومت ترمنځ د بندیانو مسئله کې بې باوري

بین لافغاني خبرې او د طالبانو او حکومت ترمنځ د بندیانو مسئله کې بې باوري

د افغانستان ملي امنیت شورا وايي، د طالبانو له لوري تر دا مهاله په خوشې شویو ۶۰ بندیانو کې یوازې ۱۹یې پوځیان دي.

د امریکا او طالبانو ترمنځ له موافقې وروسته د بین‌الافغاني خبرو پیل لپاره د بندیانو خوشې کول یو اساسي شرط یاد شوی.

دواړه خواو د بندیانو پر خوشې کېدو پیل هم کړی، خو ظاهراً ښکاري چې د دواړو خواوو ترمنځ پر دې مسئلې اختلافات موجود دي.

تازه د افغانستان ملي امنیت شورا وايي، د طالبانو له لوري د بندیانو د خوشې کېدو بهیر د دوی د غوښتنې مطابق نه‌دی.

د دې شورا ویاند جاوېد فیصل د شنبې په ورځ «۱۳۹۹ کال د وري ۳۰» په کابل کې یوې خبرې ناستې ته وویل، د طالبانو له‌خوا په خوشې شویو بندیانو کې ملکي کسان ډېر دي.

ښاغلی فیصل زیاتوي: “په کندهار کې ۲۰ نفره چې ازاد شوي، ۱۰یې پوځيان دي او ۱۰یې ملکیان، ۴۰ کسه چې په لغمان ولایت کې ازاد شوي په هغې کې ۹یې پوځیان دي، ۱۰یې ملکي کسان دي، ۱۲ هغه محلي پولیس دي چې طالبانو ته تسلیم شوي چې له دوی څخه به هم په کابل کې تحقیقات کېږي.

همداراز ۶ کسه ترخیص شوي او ۳ کسه د زراعت مأمورین دي په ټوله کې ۱۹ کسه د افغان ځواکونه دي او پاتې نور ملکي او دولتي کارکوونکي دي.”
د نوموړي په خبره، په ازاد شویو بندیانو کې داسې کسان هم شته چې په تېر یوه میاشت کې یعنې د طالبانو او امریکا ترمنځ د سولې هوکړې وروسته د طالبانو له لوري برمته شوي دي.

د افغانستان ملي امنیت شورا ویاند وايي، د طالب بندیانو د خوشې کېدو بهیر لا روان دی او تر دا مهاله‌یې ۳۶۱ طالب بندیان خوشې کړي دي.

خو طالبان بیا د افغانستان د ملي امنیت شورا دغه څرګندونې بې‌اساسه بولي او وايي، د بندیانو د خوشې کېدو د پروسې پر وړاندې خپله افغان حکومت خنډونه جوړ کړي.

د دې ډلې ویاند ذبیح‌الله مجاهد وایي د طالبانو له لوري ټول خوشې شوي بندیان پوځیان دي او دا هغه پوځیان دي چې له تېرو څو کلونو راپه دې‌خوا له طالبانو سره په بند کې وو.

خو د دې دواړو طرفونو ترمنځ دغه ډول بې‌ باروي په څه معنی ده؟

د افغانستان د اسلامي انقلاب حرکت مشر مولوي قلم‌الدین وایي دغه بې‌ باوري هغه مهال رامنځته شوه چې افغان حکومت د طالبانو له تخنیکي ټیم سره هوکړې ته ونه‌ رسېد.

مولوي قلم‌الدین وايي: “هغه مهال چې د طالبانو یو تخنیکي ټیم کابل ته راغی او دلته افغان حکومت سره د بندیانو د ازادېدو په بهیر کې جوړ رانه‌ غی، زه فکر کوم چې دغه بې‌ باوري له هغمې ڼېټې څخه پیل شوه، بله خبره دا ده چې دواړه طرفونو باید د امریکا او طالبانو ترمنځ لاسلیک شوې هوکړې ته مخ کړي په هغې کې هر څه واضح ویل شوي.”

د ښاغلي قلم‌الدین په خبره، د بین‌الافغاني خبرو د پیل لپاره باید افغان حکومت او طالبان له ترلاسه شوي فرصت څخه استفاده وکړي او افغانان یوې تل‌ پاتې سولې ته ورسوي.

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

%d bloggers like this: