کندز، تخار، او لوګر کې بریدونه: طالبانو او افغان ځواکونو ته مرګ ژوبله اوښتې

د دشت ارچي ولسوال نصرالدین سعدي وایي، د ملي امنیت پنځه سرتېري او څلور محلي پولیس تېره شپه له طالبانو سره جګړه کې وژل شوي.

سعدي زیاتوي چې دغې جګړې ټوله شپه دوام درلود چې سهار مهال پای ته ورسېده.

د نوموړي به وینا مخالفانو د امنیتي ځواکونو پر پوستو ډله‌ ییز بریدونه وکړل، بریدونه د کندز بندر او خواجه غار بندر سیمو کې وشول، سهار څلور پنځه بجې مو بېرته دا سیمې ونیولې.”

د ولسوال په خبره چې په دې برید کې طالبانو ته هم مرګ‌ ژوبله اوښتې، خو دقیق شمېر یې نه‌دی معلوم.

د تاوتریخوالي اړوند له تخاره په یوه بل خبر کې د کلفګان ولسوالۍ په بازار کې تېر ماښام د ماین چاودنې ۲ تنه وژلي او ۲۰ نور یې ټپيان کړي دي.

د چاودنې هدف د خیر محمد تیمور په نوم یو پخوانی جهادي قوماندان و چې خپله روغ ترې وتلی، خو دوه ساتونکي یې ټپیان شوي دي.

بل لور ته د لوګر امنیه قوماندانۍ وایي چې د مرکز اړوند پورک او ازرې ولسوالۍ کې یې تېره شپه اته طالبان وژلي دي.

دا پېښې په داسې حال کې رامنځ ته شوي چې په دوحه کې د طالبانو او افغان حکومت تر منځ د بین الافغاني مذاکراتو لپاره ناستې هم روانې دي

طالبانو تر اوسه د دې پېښو په اړه رسنیو ته څه نه‌ دي ویلي.